بقلم محمد البزلميط

كعادتي انا وولاد عمي في كل عام بنتلبس ( اي تم تلبيسنا بطريقة الخاوة) لفة مكوكية من اعمامي الكبار اللي بكونوا كالعادة تعبانين وما بقدروا انهم يطلعوا لمناطق بعيدة مستغلين موضوع انه لازم يعودوا الجيل الجديد على صلة الرحم، وبعد أخذ حصص تدريبية على مدى أربع أعياد تم تلبسينا رسميا بخروج مكوكي على نساء العائلة من الدرجة الخامسة في سلم القرابة.

تصوير ربى العاصي

الحلو في الموضوع، اني عمري ما شفتهم ولا بعرف اشي عنهم إلا انهم من العيلة، وبصراحة، أولها تغلبنا كثير، لأنه ما كنا نعرف العناوين ولا الوجوه فضلا عن جهلنا بالاسماء. وبتذكر اول عيد طلعنا فيه صار معنا موقف من الآخر، رحنا نعيد، فوصلنا على المبنى المطلوب وبناءا على ذاكرتنا وتحليل ابن عمي العلمي للدلائل، استنتجنا انه الجماعة ساكنين في الطابق الثالث الشقة اللي على اليمين، فدقينا الباب اكثر من ثلاث مرات، وبعد ما يأسنا من الرد، قررنا الرحيل، وإلا بختيارة كبيرة تفتح الباب، فسلمنا عليها، ودخلنا على الصالون وكان من المفروض انه نقعد بس نتيجة لسرعة الختيارة لم نتمكن، فبعد مساعدة مني ومن ابناء عمي وصلناها الى اقرب مقبرة … قصدي أقرب كرسي، المهم بعد ما قعدناها ولسى بدنا نقعد، سمعنا الختيارة بتحكي اهلا وسهــ …. واذ بصوت شخير يصدر من جهة الختيارة، إطّلعت بإبن عمي فلقيته بطّلع فيي، سألته (بعيني) شو هالصوت، فأشارلي انه بعرفش، قرب ابن عمي يشوف من وين طالع الصوت، وتصحالكم الختيارة وتشوفلكم وجه ابن عمي بوجهها، ومن خوفها تروح فاقعته كف، انا بصراحة تفاجأت وكنوع من النذالة ضحكت، ومشان امشي الموضوع، قلت ” تشربي يا حجة قهوة”، قالتلي (بعد التنهد): “آه يا خالتي ليش لأ “، راح ابن عمي (الشجاع) قعد بأبعد مكان عنها.

صبيت القهوة إلها وإلنا (هي بصراحة ما كانت قهوة يمكن كانت فلز من الفلزات المتأكسدة بكربونات المغنيسيوم) ما علينا، بعد ما سلخنا الفناجين طلعت العيدية وقلت: “كل عام وانتي بخير يا حجة”، وحطيت العيدية على الطاولة، انا سمعت طراطيش حكي بس كأنها ردت علي وقالتي وانت بخير او شي زي هيك، وكانت بدها تقوم معنا (ياحبيبي) قلتلها: “خليكي قاعدة عارفين الباب”، سلمنا وفتحت الباب وإلا زلمة قرابتنا بعرفه دخل الشقة اللي قبالنا، إطلعت على ولاد عمي وقلت طب مين هاي اللي كنا عندها !؟ طبعا انا ما سمعت رد، لأنه الخونة كانوا سبقوني على السيارة.

زبدة الموضوع هاي سُنة حث عليها النبي علية افضل الصلاة واتم التسليم ليش إنفرغها من محتواها؟ ليش لازم الواحد يلف 32 بيت مشان يقعد عشر دقايق يشرب قهوة ويدفع عيدية مشان يرفع العتب؟! الأصل وصل الأرحام وليس رفع العتب واداء واجب.